धक्कादायक: वरिष्ठांच्या कथित त्रासाला कंटाळून शिक्षकाची दोन मुलांसह गोदावरी नदीत उडी घेऊन आत्महत्या; नांदेडमधील हृदयद्रावक घटना

नांदेड जिल्ह्यातून एक अत्यंत मन सुन्न करणारी आणि हृदयद्रावक घटना समोर आली आहे. शिक्षण विभागातील वरिष्ठ अधिकाऱ्यांच्या कथित मानसिक छळाला कंटाळून एका जिल्हा परिषद शिक्षकाने आपल्या दोन निष्पाप मुलांसह कार गोदावरी नदीपात्रात झोकून देऊन आत्महत्या केली आहे. ही घटना आज, शुक्रवार दिनांक १७ जुलै २०२६ रोजी पहाटे साडेसात ते आठ वाजेच्या सुमारास मुदखेड तालुक्यातील आमदुरा येथील गोदावरी नदीच्या पुलावर घडली.

या घटनेत शिक्षक सुनील मोरे (वय ४२), त्यांची मुलगी सारा (वय १२) आणि मुलगा सुमित (वय ८) या तिघांचाही बुडून दुर्दैवी मृत्यू झाला आहे. या धक्कादायक प्रकारामुळे संपूर्ण नांदेड जिल्हा आणि शिक्षण क्षेत्रात तीव्र खळबळ उडाली असून सर्वत्र हळहळ व्यक्त होत आहे.

📌 व्हॉट्सॲप स्टेटस ठरली 'सुसाईड नोट'

मिळालेल्या माहितीनुसार, मृत सुनील मोरे हे मूळचे भोकर तालुक्यातील बेंबर येथील रहिवासी असून ते हिमायतनगर तालुक्यातील पोटा (बु.) येथील जिल्हा परिषद शाळेत शिक्षक म्हणून कार्यरत होते. मागील काही वर्षांपासून ते आपल्या कुटुंबासह नांदेड शहरातील कोकाटे सांगवी (विमानतळ परिसर) येथील गोपाळनगर भागात वास्तव्यास होते.

शुक्रवारी सकाळी 'मुलांना शाळेत सोडतो' असे सांगून ते आपल्या दोन्ही मुलांना घेऊन बलेनो कारने घराबाहेर पडले. मात्र, काही वेळातच त्यांनी आपल्या व्हॉट्सॲप स्टेटसवर एक अत्यंत वेदनादायी संदेश पोस्ट केला. यामध्ये त्यांनी "वरिष्ठ अधिकाऱ्यांच्या त्रासाला कंटाळून मी माझ्या दोन मुलांसह आत्महत्या करत आहे" असा स्पष्ट उल्लेख केला. हे स्टेटस पाहिल्यानंतर नातेवाईक आणि सहकाऱ्यांचे धाबे दणाणले, मात्र तोपर्यंत उशीर झाला होता.

🚗 वेगवान कार थेट नदीपात्रात; SDRF कडून मृतदेह बाहेर

सुनील मोरे यांनी आमदुरा-पुणेगाव रस्त्यावरील गोदावरी नदीच्या पुलावरून आपली भरधाव कार थेट लोखंडी रेलिंग तोडून नदीपात्रात पाडली. कार पाण्यात पडल्याचे स्थानिक नागरिकांच्या निदर्शनास येताच त्यांनी तातडीने प्रशासनाला माहिती दिली.

घटनेची माहिती मिळताच मुदखेड आणि नांदेड ग्रामीण पोलिसांनी महसूल अधिकारी आणि जीव रक्षक पथकासह घटनास्थळी धाव घेतली. परिस्थितीचे गांभीर्य ओळखून 'एसडीआरएफ' (SDRF) च्या पथकाला पाचारण करण्यात आले. सुमारे तीन तासांच्या अथक प्रयत्नांनंतर नदीपात्रातून कार बाहेर काढण्यात आली. कारच्या आत सुनील मोरे आणि त्यांच्या दोन्ही चिमुरड्यांचे मृतदेह आढळून आले.

पोलिसांनी मृतदेह उत्तरीय तपासणीसाठी पाठवले आहेत. घटनास्थळी वरिष्ठ पोलीस अधिकाऱ्यांनी भेट दिली असून, प्राथमिक माहितीनुसार यात हदगावचे तत्कालीन गटशिक्षणाधिकारी आणि इतर काही कर्मचाऱ्यांच्या जाचाचा उल्लेख समोर येत असून पोलीस या प्रकरणाचा सखोल तपास करत आहेत.