पाकिस्तानी कॉस्मेटिक्स तस्करीचे थेट 'दुबई कनेक्शन' उघड! नांदेड पोलिसांच्या कारवाईत मोठा खुलास

पाकिस्तानी कॉस्मेटिक्स तस्करीचे थेट 'दुबई कनेक्शन' उघड! नांदेड पोलिसांच्या कारवाईत मोठा खुलासा

नांदेड: आरोग्यास अत्यंत घातक ठरणाऱ्या आणि भारतात बंदी असलेल्या 'मेड इन पाकिस्तान' सौंदर्यप्रसाधनांच्या (कॉस्मेटिक्स) बेकायदेशीर विक्रीप्रकरणी नांदेड पोलिसांनी धडक कारवाई करत या संपूर्ण रॅकेटचे धक्कादायक 'दुबई कनेक्शन' समोर आणले आहे. विमानाद्वारे प्रवाशांच्या ट्रॅव्हल बॅगेतून ही सौंदर्यप्रसाधने भारतात आणली जात असल्याचे पोलिसांच्या तपासात निष्पन्न झाले आहे.

यापूर्वी ९ जुलै रोजी जुना नांदेड भागातील 'आफ्रा जनरल स्टोअर्स'वर इतवारा पोलिसांनी छापा मारून ३६ लाख रुपयांचा प्रतिबंधित पाकिस्तानी साठा जप्त केला होता. याबाबत सविस्तर वृत्त नांदेड दर्पणने ११ जुलैच्या बातमीत (येथे वाचा) प्रकाशित केले होते. आता त्यापुढील तपासात पोलिसांच्या हाती या आंतरराष्ट्रीय तस्करीचा मुख्य सूत्रधार लागला असून अनेक मोठे खुलासे झाले आहेत.

मुंबईतून मुख्य सूत्रधाराला अटक

जुना नांदेड येथील छाप्यानंतर सुरुवातीला स्थानिक विक्रेत्याला अटक करण्यात आली होती. पोलीस खाक्या दाखवताच त्याने मुख्य म्होरक्याचे नाव ओकले. सद्दाम याकूब शेख असे या मुख्य सूत्रधाराचे नाव असून तो मुंबईतील रहिवासी आहे. सद्दाम हा आधीच मुंबईच्या एमआरए मार्ग पोलीस ठाण्यातील एका गुन्ह्यात आर्थर रोड मध्यवर्ती कारागृहात बंदिस्त होता. नांदेड पोलिसांच्या पथकाने कायदेशीर प्रक्रिया पूर्ण करून त्याला मुंबईतून ताब्यात घेतले. त्याच्या चौकशीतूनच या संपूर्ण तस्करीची 'मोडस ऑपरेंडी' उघडकीस आली.

तस्करीची 'स्मार्ट' मोडस ऑपरेंडी

• दुबई मार्गे तस्करी: पाकिस्तान आणि दुबईदरम्यान मोठ्या प्रमाणावर व्यापार चालतो. भारत अन् इतर देशांतून दोन-तीन दिवसांच्या टूरवर दुबईला जाणारे नागरिक तेथील बाजारपेठेतून किंवा विमानतळावरून ही उत्पादने अत्यंत स्वस्त दरात विकत घेतात.
• लगेजमध्ये लपवून वाहतूक: हे प्रवासी स्वतःच्या वैयक्तिक लगेजमध्ये (बॅगेज) ही सौंदर्यप्रसाधने ठेवून विमानाद्वारे भारतातील विविध शहरांत आणतात.
• संघटित टोळी सक्रिय: कस्टम विभागाची नजर चुकवून माल देशात उतरवण्यासाठी एक मोठी संघटित टोळी काम करत असल्याचे निष्पन्न झाले आहे.

ना एमआरपी, ना कोणती गॅरंटी!

या 'मेड इन पाकिस्तान' सौंदर्यप्रसाधनांवर कोणतीही एमआरपी (कमाल किरकोळ किंमत) छापलेली नसते. त्यामुळे भारतात आणल्यानंतर हे विक्रेते ग्राहकांच्या गरजेनुसार आणि स्वतःच्या मनमानीनुसार हवे तसे मार्जिन ठरवून दामदुप्पट किमती वसूल करतात. विशेषतः स्लम एरिया (झोपडपट्टी परिसर) आणि मध्यमवर्गीय भागात या घातक कॉस्मेटिक्सचा खूप मोठा खप असल्याचे तपासात समोर आले आहे. ही उत्पादने त्वचेसाठी आणि आरोग्यासाठी अत्यंत धोकादायक मानली जातात.

(टीप: या प्रकरणातील मागील घडामोडी व ९ जुलैच्या छाप्याची सविस्तर माहिती वाचण्यासाठी नांदेड दर्पणची ही जुनी बातमी नक्की वाचा.)